«Hoc loco non alienum arbitror effundere dolorem qvendam meum et qverelam non injustam, ut opinor, si possim occurrere malo latius in dies serpenti et severis studiis doctrinæ liberalis prope perniciem minanti. Fuit qvoddam tempus superiori sæculo, qvum homines qvidam, eruditi illi qvidem, sed non satis subacti severa literarum græcarum et latinarum disciplina, qvalis his in terris per Melanchthonem et Camerarium constituta fuerat, qvod audierant, auctoribus græcis et latinis imprimis historicis cognoscendis, prudentiam politicam comparari posse, totam rationem eorum cognoscendorum ad hanc partem trahebant et, relicta severa interpretandi et intelligendi ratione, in scholis et in commentariis politicam tantum artem seqvebantur. Ejus rei dulcedine, præsertim quum difficultatis nihil haberet, capta juventus nihil nisi sententiolas politicas et locos communes de rebus civilibus captabat, secura interpretationis accuratæ et utilitatis ceteræ ex scriptorum veterum lectione recte instituta capiendæ. Sublatum est hoc literarum malum per disciplinam Gronovii et Grævii, qvorum ea de re et inani juvenum studio politicas artes discendi ex historicis non intellectis exstant narrationes.»