«I år 178 f. Kr., da M. Junius og A. Manlius var konsuler, førte romerne krig i Histria, landet nordøst for Adriahavet, og konsulen Manlius led her et vanærende nederlag. Året efter førte Junius og Manlius som prokonsuler krig i Histria. Gajus Klaudius het den konsul som dette år (177 f. Kr.) hadde fått Histria til provins. M. Junius et A. Manlius, qui priore anno consules fuerant, cum Aquileiae hibernassent, principio veris in fines Histrorum exercitus introduxerunt; ubi cum effuse popularentur, dolor magis et indignatio diripi res suas cernentes Histros, quam certa spes satis sibi virium adversus duos exercitus esse, excivit. Concursu ex omnibus populis juventutis facto repentinus et tumultuarius exercitus acrius primo impetu quam perseverantius pugnavit. Ad quattuor milia eorum in acie caesa; ceteri omisso bello in civitates passim diffugerunt. Inde legatos primum ad pacem petendam in castra Romana, deinde obsides imperatos miserunt. Haec cum Romae cognita litteris proconsulum essent, C. Claudius consul veritus ne forte eae res provinciam et exercitum sibi adimerent, non votis in Capitolio factis, non paludatis lictoribus, uno omnium certiore facto collega nocte profectus, praeceps in provinciam abiit, ubi inconsultius quam venerat se gessit. Nam cum contione advocata prioris anni fugam e castris A. Manlio objectasset et M. Junium quoque vehementer vituperasset, ad extremum utrumque decedere provincia jussit. Ad quod cum illi tum consuli dicto audientes futuros esse dicerent, cum is more majorum secundum vota in Capitolio facta, lictoribus paludatis profectus ab urbe esset, furens ira quaestorem Manlii catenas poposcit, vinctos se Junium Manliumque minitans Romam missurum. Ab eo quoque spretum consulis imperium est; et circumfusus exercitus, favens imperatorum causae et consuli infestus, animos ad non parendum accendebat. Postremo fatigatus consul et contumeliis singulorum et ludibriis multitudinis nave eadem qua venerat Aquileiam rediit. Inde collegae scripsit ut militum novorum ei parti quae scripta in Histriam provinciam esset, ediceret Aquileiam ut conveniret. Ipse Romam profectus est. Contione adveniens de Manlio et Junio habita paludatis lictoribus votisque in Capitolio factis in provinciam iterum abiit et brevi tempore Histriam totam pacavit.»