Gaius Licinius
Til eksamen 1
- 1930 · Examen artium
«Det kommer melding til Rom om L. Æmilius Paulus's seier ved Pydna over kong Persevs av Makedonien (167 f. Chr.). Tertio decimo post die quam cum rege pugnatum est, cum in circo ludi fierent, C. Licinio consuli nuntius, qui se ex Macedonia venire diceret, laureatas¹) litteras reddidisse dicitur. Consul currum conscendit, et cum per circum veheretur, laureatas tabellas populo ostendit. Quibus conspectis repente immemor spectaculi populus in medium²) decurrit. Eo senatum consul vocavit, recitatisque tabellis ex auctoritate patrum denuntiavit populo L. Aemilium collegam signis collatis cum rege Perseo pugnasse; Macedonum exercitum caesum fusumque; regem cum paucis fugisse; civitates omnes Macedoniae in dicionem populi Romani venisse. His auditis clamor cum ingenti plausu ortus; ludis relictis domos magna pars hominum ad conjuges liberosque laetum nuntium portabant. Postero die senatus consultum factum est, ut consul, quos praeter milites sociosque navales evocatos³) haberet, dimitteret; de militibus sociisque navalibus dimittendis referretur, cum legati ab L. Aemilio consule, a quibus praemissus nuntius esset, venissent. Octo diebus post legati urbem ingressi sunt. Ingentem secum occurrentium, quacumque ibant, prosequentiumque trahentes turbam in forum ad curiam perrexerunt. Senatus forte in curia erat; eo legatos consul introduxit. Ibi tantum temporis retenti, dum exponerent, quantae regiae copiae peditum equitumque fuissent, quot milia ex his caesa, quot capta forent, quam paucorum militum damno tanta hostium strages facta, quam pavide rex fugisset; existimari Samothraciam⁴) petiturum; paratam classem ad persequendum esse, neque terra neque mari elabi posse. Eadem haec paulo post in contionem traducti exposuerunt; renovataque laetitia, cum consul edixisset, ut omnes aedes sacrae aperirentur; pro se quisque ex contione ad gratias agendas ire dis, ingentique turba non virorum modo, sed etiam feminarum compleri tota urbe deorum immortalium templa. Senatus revocatus in curiam supplicationes ob rem egregie gestam ab L. Aemilio consule in quinque dies circa omnia pulvinaria⁵) decrevit hostiisque majoribus sacrificari jussit. ¹) omvundet med laurbær; ²) kjørebanen; ³) frivillig; ⁴) ø i Ægæerhavet; ⁵) gudesæte.»